نتیش، تیجسوی اور پرشانت نے جوکیا، اب وہی کرنے جارہے ہیں مکیش ساہنی، جانئے کیا ہے منصوبہ

پٹنہ : وکاس شیل انسان پارٹی (وی آئی پی) کے سربراہ اور سابق وزیر مکیش ساہنی بھی بہار کی یاترا پر نکلنے والے ہیں۔ پروگرام کا اعلان کرتے ہوئے مکیش ساہنی نے خود کہا کہ یکم اکتوبر سے وہ بہار کی یاترا پر نکلیں گے، یہ یاترا تین مرحلوں میں ہوگی۔ اپنی یاترا کے لیے انھوں نے ‘حکومت بناؤ، حقوق پاؤ’ کا نعرہ دیا ہے۔ بتا دیں کہ مکیش ساہنی نے ہفتہ کو پٹنہ میں پارٹی ہیڈ آفس میں بہار کی وی آئی پی پارٹی کے تمام ضلعی صدور اور ضلع انچارجوں کے ساتھ میٹنگ میں یہ معلومات دیں ۔

وی آئی پی سربراہ نے اس میٹنگ میں پارٹی کی آئندہ حکمت عملی اور پروگراموں کے بارے میں تفصیل سے تبادلہ خیال کیا۔ اس کے بعد مستقبل کے پروگراموں کے بارے میں تفصیل سے بتایا گیا۔ مکیش ساہنی نے کہا کہ یکم اکتوبر سے اگلے سال 28 فروری تک کسی نہ کسی ضلع میں رات کا قیام ہوگا۔ متعلقہ ضلع میں پارٹی رہنماؤں سے ملاقات اور بات چیت ہوگی۔ 11 مارچ کو آئی ٹی سیل کے ذریعہ امرشہید جبہ ساہنی کے یوم شہادت کے موقع پر پٹنہ میں نوجوانوں کے لیے ایک پروگرام کا اہتمام کیا جائے گا۔ اس پروگرام میں نوجوان شرکت کریں گے۔